КАДЭНЦЫЯ
(лац. cadentia ад cado падаю, прыпадаю, супадаю), перыяд на працягу якога праходзілі пасяджэньні Трыбунала Вялікага Княства Літоўскага, сэсія Трыбунала.
Першапачаткова К. праходзілі ў Вільні і Троках для Віленскай дэпартыцыі (Віленскае і Троцкае ваяв., Жамойць), у Наваградку і Менску для Рускай дэпартыцыі (астатняя тэрыторыя ВКЛ).
Сойм 1588 пастанавіў, што К. для Віленскай дэпартыцыі праходзяць штогод толькі ў Вільні (віленскія К.), а для Рускай — пачаргова праз год у Наваградку і Менску (рускія К.). Віленскія К. пачыналіся ад Фамінога тыдня (2-і тыдзень пасьля Вялікадня), рускія — на 4 тыдні пазьней, працягваліся па 20 тыдняў.
Сойм 1755 прызначыў для К. Рускай дэпартыцыі Горадню й новыя тэрміны для К.: віленскай — з 15 ліст. да 15 крас., горадзенскай — з 1 траўня да 30 вер.
Пасьля ўтварэньня ў Рас. Імперыі Літоўскай губерні (1797) створаны Гал. Літоўскі суд з правамі губ. суда, які таксама меў паўгадавыя К. ў Вільні й Горадне.
© Валеры Пазднякоў, 1996.
Друкаваная версія: Энцыклапедыя гісторыі Беларусі. Т. 3. Мн., 1996. С. 523.
